မိုးပျံရထားစီမံကိန်းလမ်းကြောင်းရှိ မြေပေါ်တည်ဆောက်ရန်ခက်ခဲသည့်နေရာအချို့တွင် မြေအောက်လမ်းများ ဖောက်လုပ်မည်

News Watch 22 Jun 2019

မိုးပျံရထားစီမံကိန်းလမ်းကြောင်းရှိ မြေပေါ်တည်ဆောက်ရန်ခက်ခဲသည့်နေရာအချို့တွင် မြေအောက်လမ်းများ ဖောက်လုပ်မည်

■ ■ ■ ■ ■ ■ ■ ■ ■ ■ ■ ■ ■ ■ ■ ■ ■ ■ ■ ■ ■ ■ ■ ■

ရန်ကုန်မိုးပျံရထားလမ်းစီမံကိန်း (YUMRT) ကို အကောင်အထည်ဖော်ရာတွင် မြေပေါ်တည်ဆောက်ရန်ခက်ခဲသည့် လမ်းကြောင်းအချို့၌ မြေအောက်လမ်းများ ဖောက်လုပ်ရန်စီစဉ် ထားကြောင်း ပို့ဆောင်ရေးနှင့် ဆက်သွယ်ရေးဝန်ကြီးဌာန၊ မြန်မာ့မီးရထားမှ သတင်းရရှိသည်။

မိုးပျံရထားလမ်းစီမံကိန်းတွင် အပိုင်း(၁)အရှေ့-အနောက်လမ်းကြောင်း (လှိုင်သာယာ-ပါရီမီလမ်းပိုင်း)နှင့် အပိုင်း(၂) တောင်/ မြောက်လမ်းကြောင်း (မင်္ဂလာဒုံ လေဆိပ်- ဒလလမ်းပိုင်း)ဟူ၍ အပိုင်း(၂) ပိုင်းရှိပြီး အဆိုပါလမ်းကြောင်း ၂ ခု နှိုင်းယှဉ်ချက်အရ ယာဉ်ကြောကျပ်တည်းမှုအများဆုံးအချိန်၌ ယာဉ်အစီးရေများနှိုင်း ယှဉ်ချက်အရ အရှေ့-အနောက်လမ်းကြောင်းကို ဦးစားပေးလမ်းပိုင်းအဖြစ် ရွေးချယ်ထားကြောင်း သိရသည်။

''တောင်/မြောက်လမ်းကြောင်းက ဒလကနေ ရန်ကုန်လေဆိပ်အထိပေါ့။မင်္ဂလာဒုံလေဆိပ်အထိ သွားမယ်။ အဲဒါကျတော့ သူကတော်တော်များများက မိုးပျံသွားလို့မရတဲ့ နေရာတွေမှာ မြေအောက်ကနေသွားမယ်။ မြစ်ကိုလည်း မြေအောက်ကနေသွားမယ်။ မြို့ထဲဝင်ရင်လည်း မြို့လယ်ကောင် ရန်ကုန်ဘူတာကြီးနားလည်း ဝင်ဖို့လမ်းကြောင်း သိပ်မရှိဘူး။အဲဒါကျရင် မြေအောက်ကနေ ဝင်လာမှာပေါ့။ လွတ်တဲ့နေရာကျမှ မိုးပေါ်တက်မှာ'' ဟု မြန်မာ့မီးရထားမှ တာဝန်ရှိသူတဦးက ပြောသည်။

စီမံကိန်းအပိုင်း(၁)သည် လှိုင်သာယာဘူတာမှစတင်၍ ရန်ကုန်-ပုသိမ်လမ်းအတိုင်း လှိုင်မြစ်ကိုဖြတ်ကျော်၍ ပါရမီလမ်းအတိုင်း ပါရမီဘူတာအထိရှည်ပြီး လိုအပ်သောလမ်းအကျယ်မှာ ရန်ကုန်-ပုသိမ်လမ်းတလျှောက်တွင် ၂၉ မီတာ၊ ပါရမီလမ်းတလျှောက်တွင် ၂၂ မီတာဖြစ်ကြောင်းနှင့် YUMRT ဆောင်ရွက်ရာတွင် ရထားလမ်း တလျှောက် အကျိုးသက်ရောက်မည့်နေရာများမှာ - လှိုင်သာယာဘူတာ ပရဝဏ်အတွင်း YUMRT ယာဒ်ဝင်း တည်ဆောက်ရန် (၅၄၁ ဒသမ ၃၆) ဧက၊ ရန်ကုန်-ပုသိမ် လမ်းတစ်လျှောက်တွင် ရထားလမ်း၏ အလယ်မျဉ်း မှ တဖက်တချက်စီ (၁၄ ဒသမ ၅) မီတာ အကျယ်၊ ပါရမီလမ်းတလျှောက်တွင်အလယ်မျဉ်းမှ တဖက်တချက်စီ ၁၁ မီတာအကျယ်ဖြစ်ကြောင်း သိရသည်။

စီမံကိန်းအပိုင်း (၁)လှိုင်သာယာ-ပါရမီလမ်းပိုင်းတွင် ဘူတာရုံများတွင် ဓာတ်လှေကား၊ လက်မှတ်ရုံ၊ စင်္ကြံ၊နားနေ ဆောင်များပါဝင်မည့် ဘူတာပေါင်း ၂၂ ခုပါ ရှိမည်ဟု သိရသည်။ ယင်းစီမံကိန်းကို အမေရိကန်ဒေါ်လာ (၁)ဘီလီယံသုံးစွဲကာ ၂ဝ၂၁ တွင် စတင်မည် ဖြစ်ပြီး ၂ဝ၂၇ တွင် ပြီးစီးရန်လျာထာကြောင်းနှင့် စီမံ ကိန်းအပိုင်း (၂) ရန်ကုန်တောင်/ မြောက် လမ်းကြောင်းကို ဒလမြို့ဘက်သို့ ဆက်လက်ဆောင်ရွက်မည်ဖြစ်၍ မိုးပျံရထား လမ်းစီမံကိန်းတခုလုံး ၂ဝ၃၅ ခုနှစ်တွင် ပြီးစီးမည်ဟု သိရသည်။ အဆိုပါစီမံကိန်း တခုလုံး အကောင်အထည်ဖော်ရာတွင် မြေအောက်မှ ဖောက်လုပ်ရမည့် အစီအစဉ် များပါဝင်နေပြီး ထိခိုက်မှုအနည်း ဆုံးလမ်းကြောင်းကို ရွေးချယ်သွားမည်ဖြစ်ကြောင်း အဆိုပါတာဝန်ရှိသူက ပြောသည်။

''နှစ်မျိုးစလုံး ပါတယ်ပြောရမှာပေါ့။ phase 1 မှာတော့ မိုးပျံကအပေါ်က သွားတာများမယ်။ ဘယ်လိုမှ မရဘူးဆိုတော့မှ မြေကြီးအောက်ကနေသွားမယ်။ မြေကြီးအောက်ကနေသွားမယ်ဆိုရင်တော့ underground ဆိုရင် ကုန်ကျစရိတ်က အရမ်းများသွားမယ်။ ဖြစ်နိုင်သလောက်တော့အပေါ်က သွားဖို့ကြိုးစားတာပေါ့။ ထိခိုက်မှုနည်းတယ်ဆိုရင် အပေါ်ကပဲသွားမှာပဲ''ဟု ၎င်းက ပြောသည်။

စီမံကိန်းအပိုင်း(၁)ဖြစ်သည့် လှိုင်သာယာ-ပါရမီလမ်းပိုင်းအတွက် မြေယာလျော်ကြေးပေးရန် JICA ၏ သဘာဝ ပတ်ဝန်းကျင်နှင့် ဘူတာပတ်ဝန်းကျင် ထိခိုက်မှုဆန်းစစ်ခြင်းမူဝါဒနှင့် နိုင်ငံတကာငွေကြေးအဖွဲ့အစည်းများမှ ချမှတ်ထားသောစံနှုန်းများနှင့်အညီ စစ်တမ်းကောက် ယူမှုကို မေ ၆ ရက်မှစတင်၍ ဇွန် ၃ဝ ရက်အထိ ပြုလုပ်လျက်ရှိကြောင်း ရန်ကုန်မြို့တော်စည်ပင်သာယာရေးကော်မတီမှ ထုတ်ပြန်ထားသည်။

စီမံကိန်းအပိုင်း(၁)တွင် လှိုင်သာယာ၊ မရမ်းကုန်း၊ လှိုင်၊ ရန်ကင်းနှင့် တောင်ဥက္ကလာပစသည့် မြို့နယ် ၅ ခု တို့ပါဝင်နေပြီး ယင်းမြို့နယ် ၅ ခုရှိ ပြည်သူ နှင့်တွေ့ဆုံပွဲကိုလည်း ဇွန် ၁ ရက်၊ ၈ ရက်၊ ၁၄ ရက်တို့တွင် ပြုလုပ်ခဲ့ပြီး ဖြစ်သည်။ ထိုသို့ လူထုတွေ့ဆုံမှုပြုလုပ်ရာတွင် မြန်မာ့မီးရထားမှစီမံကိန်း တာဝန်ရှိသူများ ယင်းမြို့နယ်များရှိ သက်ဆိုင်ရာလွှတ်တော်ကိုယ်စားလှယ်များ၊ မြို့နယ်ထွေအုပ်၊ စည်ပင်ဌာန၊ စီမံကိန်းဧရိယာ တွင်ရှိသော ပြည်သူများတက်ရောက်၍ စီမံကိန်းဆိုင်ရာ အချက်အလက်များ၊ သဘာဝပတ်ဝန်းကျင်နှင့် လူမှုဝန်းကျင်ထိခိုက်မှု ဆန်းစစ်သည့် လုပ်ငန်းစဉ်၊ စီမံကိန်းသက်ရောက်မည့် ဧရိယာတခုလုံးကို စစ်တမ်း ကောက်ယူမည့်လုပ်ငန်းစဉ်များနှင့်ပတ်သက်၍ ရှင်းလင်းခြင်း၊ ဆွေးနွေးမှုများ ပြုလုပ်ခဲ့ကြောင်း သိရသည်။

Posted By  : Seint Yupar Zaw (www.findpropertymm.com)

 Ref & Photo Credit  : News Watch  June 22 2019