လျှပ်စစ်ရထားဖြင့်ပြေးဆွဲမည့်   မန္တလေး-မူဆယ်ရထားလမ်း   ပြေးဆွဲချိန်သုံးနာရီသာကြာမြင့်မည်

Myanmar Builder Guide 03 Jul 2019

မန္တလေး-မူဆယ်ဆက်သွယ်မည့်ရထားလမ်းဖောက်လုပ်ရန် ပတ်ဝန်းကျင်ဆန်းစစ်လေ့လာမှုများလုပ်ဆောင်လျက်ရှိရာ အကောင်အထည်ဖော်နိုင်ပါက ရထားလမ်းမှာ လျှပ်စစ်ရထားလမ်းဖြစ်ပြီး လျှပ်စစ်ရထားဖြင့် တစ်နာရီလျှင်မိုင် ၁၀ဝ နှုန်းဖြင့်ပြေးဆွဲသွားမည်ဖြစ်ရာ သုံးနာရီသာကြာမြင့်မည်ဖြစ်၍ကုန်စည်စီးဆင်းမှုမြန်ဆန်ပြီး နေ့ချင်းပြန်သွားလာနိုင်တော့မည်ဖြစ်ကြောင်း မြန်မာ့မီးရထား(အထက်မြန်မာပြည်)အထွေထွေမန်နေဂျာ ဦးမျိုးဝင်းက ပြောဆိုသည်။

ဆန်းစစ်မှုပေါ်မူတည်

အဆိုပါမီးရထားလမ်းပိုင်းမှာ မူဆယ်မှ တရုတ်ပြည်မကြီးအတွင်း ကူမင်းမြို့နှင့် ဆက်သွယ်မည်ဖြစ်ပြီး ရထားလမ်းတည်ဆောက်ရေးကုန်ကျစရိတ်များကို တရုတ်ပြည်ဘက်မှကျခံသွားမည်ဖြစ်သော်လည်း စီမံကိန်းမှာ မသေချာသေးဘဲ EIA / SIA ဆန်းစစ်မှုများပေါ်မူတည်သည်ဟု သိရသည်။

စတင်လုပ်ဆောင်

"ရထားလမ်းဖြစ်နိုင်စွမ်းလေ့လာခြင်းအတွက် ပတ်ဝန်းကျင်ထိခိုက်မှုဆန်းစစ်မှုတွေကို ဇွန် ၂၅ ရက်ကစပြီး နေရာ ခြောက်ခုမှာ စတင်လုပ်ဆောင်နေပါပြီ။ လုပ်ဖြစ်မယ်၊ မဖြစ်ဘူးဆိုတာကတော့ မသေချာသေးဘူး။ လက်ရှိမန္တလေး-ရန်ကုန် ၃၈၅ မိုင်ကျော်ကို မီးရထားနဲ့ ၁၄ နာရီကြာတယ်။ မူဆယ်ရထားလမ်းပြီးသွားရင် သုံးနာရီနဲ့မောင်းမှာဖြစ်လို့ တရုတ်ကို နေ့ချင်းပြန်သွားနိုင်တော့ ကုန်ပစ္စည်းသယ်ယူပို့ဆောင်ရေးမှာ မောင်းချိန်တိုတောင်းတဲ့အတွက် ကုန်စည် စီးဆင်းမှု မြန်ဆန်လာမယ်"ဟု ၎င်းက ပြောဆိုသည်။

ရထားလမ်းသစ်ဖောက်လုပ်ရေးဖြစ်နိုင် ခြေလေ့လာမှုလုပ်ငန်းဆောင်ရွက်ရန် နားလည်မှုစာချွန်လွာကို ၂၀၁၈ ခုနှစ် အောက်တိုဘာ ၂၂ ရက်က မြန်မာ့မီးရထားနှင့် China Railway Eryuan Engineering Group Co., Ltd. (CREEC) တို့လက်မှတ်ရေးထိုးခဲ့ကြောင်း၊ လမ်းအူကြောင်းကနဦးရှာဖွေမှုကို ၂၀၁၈ ခုနှစ် ဒီဇင်ဘာ ၅ ရက်မှ ၁၂ ရက်အထိဆောင်ရွက်ခဲ့ပြီး လမ်းဘူတာပေါင်း ၁၂ ခုခန့်ရှိကြောင်း သိရသည်။

မြေယာနစ်နာမှုပေးလျော်မည်

"ကောင်းကျိုးတွေအများကြီးရှိနိုင်သလို မကောင်းကျိုးလည်းရှိနိုင်တယ်။ ရထားလမ်းဖြစ်လာတဲ့အတွက် တခြား သက်ရောက်မှုတွေရှိလာနိုင်ပေမယ့် ကြိုတင်ကာကွယ်နိုင်မယ့်အနေအထားရှိပါတယ်။ မြေယာနစ်နာမှုတွေကိုလည်း နိုင်ငံတော်က ပေးလျော်မှုအစီအစဉ်ရှိတယ်။ ခုမှ ဖြစ်နိုင်စွမ်းလေ့လာဆန်းစစ်တာပဲရှိသေးတယ်။ လုပ်သင့်လုပ်ထိုက်တဲ့လုပ်ငန်းပါ။ ပွင့်လင်းမြင်သာမှုရှိစွာနဲ့ နိုင်ငံအတွက်၊ ပြည်သူအတွက် အကျိုးရှိရင်လုပ်ရမှာပါ"ဟု အမရပူရမြို့နယ် မဲဆန္ဒနယ် ပြည်သူ့လွှတ်တော်ကိုယ်စားလှယ် ဦးအောင်ဇော်မြင့်က ပြောဆိုသည်။

မန္တလေး-မူဆယ်လမ်းပိုင်းတစ်လျှောက်တွင် တံတားကြီးငယ် ၁၂၄ စင်း၊ ဥမင်လိုဏ် ၆၀၊ ဘူတာ ၃၆ ခုရှိမည်ဟု ခန့်မှန်းထားကြောင်း၊ ဆောင်ရွက်မည့်လုပ်ငန်းများမှာ မြေတိုင်းခြင်းတွင် GPS, Total Station တိုင်းတာခြင်း၊ အုတ်ခုံများဖြင် Level  များပြုလုပ်ခြင်း၊  Geographical Survey တွင် ရေ၊ မြေ၊ ကျောက်နမူနာယူခြင်း၊ မြေဆီလွှာ စမ်းသပ်ခြင်း စသည့်လုပ်ငန်းများပါဝင်မည်ဖြစ်ကြောင်း သိရသည်။

 

Ref & Photo Credit : Myanmar Builder Guide

Posted By : Thazin Hnin Htet (www.findpropertymm.com)